الجزء الثالث : استلام عامل المباني والبياض

نستكمل سلسلة اعداد مهندس موقع محترف وبعد ما اتكلمنا عن كيفية استلام اعمال الحفر والخنزيرة والخرسانة العادية والمسلحة للقواعد بالجزء الاول وكذلك عن طرق استلام حدادة ونجارة الاعمدة والحوائط والاسقف المسلحة بالجزء التاني تعالوا بينا نتكلم انهاردة عن كيفية استلام اعمال المباني والبياض :

استلام عامل المباني

البنا لازم يسلمك الاد الاول والاد دا بيبقي اول مدماك وبتوقع بيه شكل الحوائط وفتحات الابواب
وانت بتستلم الاد تاخد بالك انك تربع الغرف وتاخد مقاساتك من على اللوحات كويس وتوزن الاد مع الكمرات ( هام )
نتاكد ان الاد دا تم تركيبة على فرشة مونة كاملة ومستوي تماما افقيا
لازم نستلم معاها تركيب الكانات مع الاعمدة الخرسانة كل 60 سم او اسياخ مزروعه مجلفنة قطر 10 مم
نتاكد من محاكية الباب بينها وبين العمود ماتقلش عن 20 سم ولو قلت تتصب خرسانة دا في حالة المباني النص طوبة
تتاكد من الشرب انه مستوي واحد علشان ياخد منه مناسيب الاعتاب والجلسات
بعد مايبنى نستلم ملء عراميس الطوب طولي وعرضي من الاتجاهين ( وش وضهر )
نتاكد من راسية الحائط بالميزان الشاغول او البلبل
نتاكد من استواء السطح فى كل الاماكن
مراجعة اماكن وابعا الابواب والشبابيك وابعادها مع اعتبار الحلق الزفر للابواب والشبابيك
نتاكد من ان سمك اللحامات مايزيدتش عن 2 سم راسي وافقي
نتاكد من الشاحط اسفل الكمرات والسقف مفيش فيه فراغات ومتخدم كويس
فى حالة المباني طوب اسمنتى ومصمت يلزم عمل ثلاث مداميك اسمنتي تحت ومدماك اسمنتى شاحط وبامتداد العتب والجلسة مدماك اسمنتى ومسار الكهربا واى اعمال تكسير مستقبلية يكون اسمنتى وطبعا المحاكيات اسمنتى بعرض مايقلش عن 25 سم للبعد الاصغر فى السابق واللاحق
حوائط الحمامات والمطابخ يتم بناء ارتفاع 1.2 م اسمنتى والشاحط اسمنتى والباقي طفلي ويفضل يكون الحمامات والمطابع بالكامل اسمنتى
بعد البناء يتم المعالجة بالرش بالمياة لمدة 24 ساعه صباحا ومساءا
حوائط الهاندريل للسلالم والبلكونات كلها طوب اسمنتى مصمت
يفضل بناء الجدار على مرتين علشان الطوب يريح مع المونه ومايشرخش بعد كدة
بالنسبة لقصات الردم اقصي ارتفاع ليها 1 م
فى الارتفاعات الكبيرة اقصي ابعاد لباكية المباني 18 م2 واكبر من كدة بنعمل كمرة رابطة فى المنتصف

استلام اعمال البياض

اولا : استلام اعمال طرطشة البياض

نتأكد من نسب خلطة الطرشة وممكن تراجعوا مدونة استهلاك المواد لمعرفة النسب المطلوبة لكل العناصر
لازم نتاكد من رش المياة على الحائط علشان مايشربش ميا الطرطشة وتبقي عامله زى التراب
مايقلش سمك الطرطشة عن 0.5 سم
لازم نتاكد من انتهاء تأسيس الالكتروميكانيك بالحوائط والتسديد عليها
لازم نتاكد انه تم ملء جميع الفراغات والشنايش بالحائط وتم تركيب شبك التمدد وتثبيته جيدا زجزاج كل 30 سم ويتم الطرطشه
مشي ايدك على الطرطشة لازم تحس انها خشنه وممكن تعورك وكلها متناسقه مفيش مكان كثيف عن مكان
طريقة الطرطشة بالماكينة او بالمسطرين او بالكوز بس يطرطش من بعيد وبقوة
بعد الطرطشة نتاكد من معالجة السطح صباحا ومساءا يومين

ثانيا : استلام اعمال البؤج والاوتار والبياض

لازم توجه المقاول انه يعمل بؤج واوتار على مسافات ماتزيدتش عن 2 م وارتفاع اول وتر عن الارض ب 50 سم ونازل عن السقف ب 50 سم
نوزن الاوتار مع بعض راسيا ومع الاركان بالقدة
نتاكد طبعا ان سمك البؤج والاوتار مايزيدتش عن 2.5 سم ومايقلش عن 1.5 سم وفى الاسقف 1.5 سم فقط
لازم نعمل زوايا قائمة بين الاربع حوائط ( نربع الحوائط)
يتم تكسير البؤج والاوتار بعد الملو والتخشين وقبل التنعيم
يتم استلام البياض بعد الملو بالدراع في الظلام ونولع كشافات فى ضهر الدراع ونوقف الدراع على سنه ولو مر ضوء شكرا
يتم استلام البياض بعد الملو بالزوايا فى الاركان كلها ومع السقف
لون الخلطة يكون متجانس ومش مرمل ولا مسيل ( لو مش فاهم ابعتلى رسالة )