الجزء الاول : استلام اعمال الحفر والخنزيرة والخرسانة
العادية والمسلحة للقواعد
نبدا معاكم فى سلسلة تعليم طرق استلام الاعمال المدنية والمعمارية وهتلكم
معاكم باللهجة العامية علشان اقدر اوصل ليكوا المعلومة بشكل مبسط وسهل ولازم قبل
ما تبدأ تنزل على اى بند تستلمه تكون مجهز نفسك انت نازل تستلم ايه وتجهز لوحاته
وبياناته المطلوبة وماتنزلش على بند لسه اول مرة تسمع عنه فى الموقع , وانا هنا
قسمت الاعمال طبقا لمراحل التنفيذ بدءأ من الحفر والخنزيرة وخلافة وهي كالاتي :-
- نراجع منسوب التأسيس مع اللوحات ومع اقرب روبير
- نراجع ابعاد الحفر طبقا للوحات
- نراجع نضافة قاع الحفر وزيادة ابعاد الحدود بمقدار 1:1
- نتأكد من نوع التربة ولو شكيت فيها خود عينه حللها وطبعا لو تمام لازم تعمل اختبار الدمك
استلام الخنزيرة
- نستلم الابعاد الخارجية للخنزيرة بحيث تكون اكبر من ابعاد الحفر بمسافة تمنع تأثرها بالحفر
- شد خيط على كل ضلع واتأكد من استقامته
- اتأكد من وزنه الخنزيرة بميزان القامة ولازم تكون لفل واحد
- اتاكد من ان كل ضلع متقوي بالخوابير او الاشكالات واخبطهم برجلك لو تمام كمل ويكونو خلف خلاف وعلى مسافات 50 سم
- نربع الخنزيرة بمعنى ان تكون الزوايا البينية 90 درجة بنظرية فيثاغورث (3-4-5)
استلام نجارة الخرسانة العادية للقواعد
- نجهز لوحة تأكيس تستلم عليها طبقا للى متنفذ عليها ونقارنها بالشوب درونج
- نطابق على الطبيعة التأكيس ونربعها وخلى بالك خود الابعاد واعمل حسابك فى نوع المتر لو معدنى او كتان علشان الاستطالة وعاين الدبله الاول علشان لو مهوية بمعنى اصح خلى النجار يطلع 10 سم واحسب من بعدها
- نراجع ابعاد القواعد العادية وارتفاعها ومنسوبها ونحط لوح او قدة على الجوانب ونشوف التربة فى المنتصف محققه ولا محتاجه نحت
- مراجعة تقفيل جوانب العادية والتقويات وتسديد الفتحات طبعا المشمع وتثبيته
- مراجعه لو فيه مسارات الكهربا او الصحي او هبوط فى غرف تجميع فى القواعد العادية
استلام نجارة الخرسانة المسلحة للقواعد
- نعيد التأكيس ونعلمه على الخرسانة العادية بخيط وبودرة ملونة ونستلمة زى تأكيس الخرسانة العادية
- بعد شد النجارة نتاكد من مطابقة النجارة للتوشيح
- نتاكد من رأسية جوانب القواعد والسملات
- نتأكد من تقوية القواعد وعدم وجود فتحات تهريب خرسانة
- نراجع اماكن فتحات الصرف الصحى والكهربا وخلافة
استلام حديد تسليح الاساسات
- نتاكد من نظافة حديد التسليح وعدم وجود صدأ ونخلى بالنا الفرق بين الحديد اللى واخد لون او صدأ ولو الحديد مصدي فيه رش بيزيل الصدأ او انها يسحبه من وسط كومة رمل او يستعمل رماله
- نتأكد من نوع وقطر الحديد وعدده واطواله طبقا للوحات ومثلا لو القاعده طولها 1 م وموجود التلسيح 7 فى المتر يبقي نعد 8 بالباديء وهكذا
- فرق بين الفرش والغطا طبقا للرسومات
- مراجعة اماكن وتأكيس واطوال اشاير حديد الاعمدة وعدد الكانات بارتفاع القاعدة وكانه عند طرف الاشارة وان رجل الاشارة بالقاعد ماتقلش عن عرض العمود او 20 % من القطر
- التأكد من تربيط الحديد الجيد
- لو فيه حديد علوى نراجع وجود كراسى حاملة
- التاكد من تركيب البسكوت سواء البلدي او البلاستيك
- لو فيه باليتات نراجع تأكيسها واماكنها زى ما عملنا مع اشاير الاعمدة بالظبط وطبعا طبقا للوحات
- نتاكد من وزنة القواعد بميزان القامة
- نراجع وجود كانات شتش للسملات وماتقلش عن كانتين لكل باكية
الى اللقاء مع الجزء الثاني ,,,,,
ليست هناك تعليقات:
إرسال تعليق