بعد المقال السابق واللى اتكلمت فيه عن ازاى تاخد شغل لحسابك طبعا حضرتك عاوز بقا تفتح مكتب خاص بيك فانا هديك العنواين الرئيسية انك ازاى تفتح مكتب مقاولات :
- اول حاجة لازم تشوف مكان مناسب ايجار او تمليك يسهل الوصول ليه ويكون واجهه كويسه ليك لو حد جالك المكتب ويفضل تعمل رخصة تجارية للمكان
- تشوفلك محاسب قانوني يعملك بطاقة ضريبيه وسجل تجاري باسم المكتب
- تعمل تسجيل فى اتحاد مقاولى التشييد المصري ودا مكانة فى مدينة نصر-المنطقة التاسعه شارع الفنان عماد حمدي الموازى لشارع مصطفى النحاس وليه فروع كتير فى كل المحافظات
- تعمل تسجيل فى اتحاد المقاولين حسب نوع الشركة ( شركة فردية-شركة مساهمه - شركة تضامن ) وتعالوا نشوف ازاى اسجل شركة فردية لانها دى الشائعه للمبتديء في عالم المقاولات :
- تجيب مستخرج رسمى من السجل التجاري ويكون فيه قيمة رأس المال على ان يكون نوع النشاط مقاولات ويكون ما مرش عليه اكتر من شهرين
- نجيب بردو اصل البطاقة الضريبيه مستخرجة بالحاسب الالى ويكون فيها واضح نشاط المقاولات
- نعمل شهادة من التأمينات الاجتماعيه تفيد وجود المنشأه وكشف او بيان بالمؤمن عليهم لديه واثبات بوجود مهندس متخصص لنفس نوع الاعمال المطلوبة بشهادة من نقابة المهندسين ومعاه اصل البطاقة واصل كارنية النقابة للاطلاع
- نستخرج بردو فيش وتشبيه موجهه لاتحاد المقاولين لصاحب المكتب ( اللى هو حضرتك طبعا )
- عقد ايجار للمكتب بتاعك وثقه من الشهر العقاري وخده معاك ولو تمليك خود اللى يفيد دا
- كشف وفيه مستندات وفواتير شرا او عقود عن المعدات المملوكة لطالب القيد ما عدا الاعمال التكميلية بحيث ان قيمه المعدات ماتقلش عن 40% من راس المال
- شهادة من البنك اللى بتتعامل معاه بيفيد تاريخ فتح الحساب والمبلغ الموجود وخلى بالك لازم المبلغ مايقلش عن 60% من رأس المال
نسيت اقولك ان رأس المال اللى صدعتك بيه دا بيكون 100 الف جنيه ماعدا الاعمال التكميلية التخصصية بيكون 20 الف ج والاعمال البحرية والنهرية والتكريك 500 الف ج
ملحوظة :
لو هتعمل شركة عن الاعمال التكميلية هتعمل كل الخطوات ماعدا موضوع المهندس المتخصص هتجيب شهادة من مهندس استشاري بالاشراف على الاعمال وصورة من كارنية النقابة بتاعته وصورة من شهادة الاستشاري من النقابة
السجل الهندسي دا يا سيدى هوا دفتر تسجيل اعمالك من تقارير لشهادات وبيعمله اى عضو فى نقابة المهندسين اتخرج من تلت سنين واكتر ودا سجل شخصي للمهندس بس وبيكون دفتر مكون من 60 صفحة مختوم على الصفحات الفردية بختم النقابة وخلى بالك اوعى تقطع اى ورقة او تشخبط فيه طب تعالو نعرف ازاى بستخرج السجل الهندسي دا ؟
- تروح النقابة ولازم طبعا تكون متسجل ومعاك رقم العضوية
- عدى على تخرجك اكتر من 3 سنين
- معاك شهادات الخبرة بتاعتك
- تقدم طلب ويكون فيه المستندات دى :
- طلب مطبوع من النقابة - نموذج رقم 1
- اقرار مطبوع من النقابة - نموذج رقم 2
- اصل وصورة من البطاقة
- اصل وصورة من الكارنية
- اصل وصورة من ايصال الدفع ( رسوم النقابة )
- شهادة عضوية النقابة
خطوات استخراج السجل
- دفع مبلغ قيمته --- بالخزنة بالدور الارضي لاستخراج السجل وشهادة العضوية
- استلام شهادة العضوية من مكتب الخدمات النقابية
- هتروح لادارة ممارسة المهنة لملء الطلب والاقرار
- هتملي الطلب ( نموذج 1 ) وتاخد توقيغ مدير ادارة ممارسة المهنة
- توقيع الموظف ثم مدير الادارة ثم ختم السجل واستلامة
بالتوفيق
ليست هناك تعليقات:
إرسال تعليق