الجزء الثاني : استلام اعمال نجارة وحدادة الاعمدة والاسقف الخرسانية
هنكمل مع بعض السلسلة المهمة دى لاعداد مهندس موقع محترف وبعد ما شرحنا ازاى تستلم اعمال الحفر والخنزيرة والخرسانة العادية والمسلحة كنجارة وحديد تسليح هنتعلم انهاردة ازاى نستلم نجارة وحدادة اعمدة وحوائط وسقف خرساني يالا بينا :
استلام اعمال نجارة الاعمدة الخرسانية
- نراجع التأكيس من تانى
- نراجع ابعاد الحطات وقطاع الاعمدة ونخلى بالنا واحنا بنعمل اللوحة بخصم سمك التجاليد 2.5 سم او زى مانت عاوز بس علشان تنظم شغلك خلى لوحتك اللى هتستلم بيها منظمة وواقعيه وسهله
- بعد مايقفل هنتاكد من تسديد الفتحات
- نتاكد من منسوب نهاية الصب (الشيرب ) واغلب النجارين بيهبط جنب واحد على المنسوب علشان مايهدرش خشب ودا الافضل
- نراجع التقويات كويس جدااااااا ونراجع على القمط والزاجين وخلى اى يطلع عليهم لو شاكك
- نراجع الوزنات الرأسية
- اول عمود هنوزنه واخر عمود ونشد خيط على نفس الاكس والجنب اللى نشد عليه اكس مش هنوزنه طالما الحطط مظبوطة من تحت ونوزن من الجنب التاني ( العمودي عليه )
استلام حدادة تسليح الاعمدة والحوائط
- نتاكد من نظافة حديد التسليح وعدم وجود صدأ ونخلى بالنا الفرق بين الحديد اللى واخد لون او صدأ ولو الحديد مصدي فيه رش بيزيل الصدأ او انها يسحبه من وسط كومة رمل او يستعمل رماله
- نتأكد من نوع وقطر الحديد وعدده واطواله طبقا للوحات
- نراجع عدد الكانات واقطارها وقفل الكانات ومايكونوش فى اتجاة واحد ونراجع تكثيف الكانات وان اول كانة على ارتفاع 5 سم من الخرسانة وبردو طبقا للوحات
- نراجع تربيط الكانات ويكون سلك الرباط مقصوص على السيخ مش مشعر وبردو خلى حد يطلع على الكانات وهيبان التقوية
- التاكد من تركيب كانات عيون لضمان تقسيط الاسياخ المظبوط
- التاكد من رأسية اسياخ الاعمدة وافقية الكانات
- نراجع على البسكوت فى كل الجوانب وعدد كافي ونكتر شوية تحت
- نتاكد من طول الاشارة
- نتاكد من نضافة كعب العمود قبل التقفيل
لمتابعة سلسله اعداد مهندس موقع محترف ( طرق استلام الاعمال ) - الجزء الاول اضغط هنا
استلام اعمال نجارة الاسقف الخرسانية ( تحت السقف )
- نراجع على المسافات البينية للعروق ( القوايم ) وماتزيدتش عن 80 سم ونرجاع على حالة العروق ورأسيتها
- مراجعة اماكن وصل العروق مع بعض فى حالة الارتفاعات العالية وماتكونش راس فى راس تكون اوفرلاب مايقلش عن 50 سم ونحبسها بضفدعه ونربطها بقمطة
- نراجع جودة واسقامة العرقات للكمرات والسقف وتثبيتها
- مراجعة التقويات المائلة ( النهايز ) وتثبيتها جيدااا فى كل الاتجاهات
- مراجعة تقوية قاعد الكمرات بقمط بمسافات ماتزيدتش عن 50 سم والعروض بكامل طول الكمرة
- مراجعة رقاب الاعمدة وان مفيش فراغات علشان هتجمع خرسانة وهتعوز تكسرها بعد كدة والحل بالابلكاش
- نراجع التسديد من تحت السقف ومايكونش فيه نور كتير باين
- نراجع تواجد العرقات فى اماكن التقاء الواحد التطبيق مع بعض
استلام اعمال نجارة الاسقف الخرسانية ( فوق السقف )
- قبل اى شغل نعيد التأكيس تاني ونراجع الابعاد الخارجية وتأكيس الباكيات مع المحاور
- مراجعة مناسيب البلاطات مع الروبير وفى حالة البلاطات الاكبر من 16 م2 بنرفع 2 سم من النص
- نراجع على ابعاد الكمرات وسقوطها
- نراجع على ترابيع البلاطات
- نرجع على منسوب الصب من الحروف الخارجية وانها مستوي واحد ونعمل شيرب صب على اسياخ الاعمدة ونعمل سيخ محمول كدة فى الايد مجس لسمك الخرسانة اثناء الصب
- اهم نقط نراجعها من ناحيه التسديد ( التقاء الواح التطبيق مع بعض واركان الكمرات وحولين الاعمدة )
- مراجعة اماكن فتحات الالكتروميكانيك
استلام اعمال حدادة الاسقف الخرسانية
- نتاكد من نظافة حديد التسليح وعدم وجود صدأ ونخلى بالنا الفرق بين الحديد اللى واخد لون او صدأ ولو الحديد مصدي فيه رش بيزيل الصدأ او انها يسحبه من وسط كومة رمل او يستعمل رماله
- نتأكد من نوع وقطر الحديد وعدده واطواله مع مراعاة الباديء طبقا للرسومات
- مراجعة اماكن الوصلات واماكنها ونركز جداا فى النقطة دى
- نراجع اماكن الحديد الاضافي وطبعا هنراجع الطبقة الاولى فرش وغطا وبعد مانستلم يعمل الرقة التانية ونستلمها
- مراجعة الفرش والغطاا
- نتاكد من عدد اسياخ واقطاع وكانات حديد الكمرات وعلى الاقل يوجد 3 كانات شتش لكل كمرة
- نتاكد من تربيط كل اسياخ الكمرات بالكانات ومراعاة تقسيط الكانات وعدم قفل الكانة فى مستوي واحد ويفترض ان يكون القفل فى منطقة الضغط
- لو فيه تكسيح نتاكد من المسافات جيدا والاطوال والطبقات
- نراجع على البسكوت واماكنه وانه يستحمل وزن الحديد
- نراجع على الكراسي واماكن توزيعها واطوالها
- مراجعة اماكن اشاير الاعمدة وتثبيتها جيدا بكانة عيون فى منسوب حديد السقف
- التأكد من تكسيح حديد اشاير عمود الدور الاخير داخل السقف
- مراجعة ربط حديد السلم مع السقف ومراعاة طول الوصلات
الى اللقاء
مع الجزء الثالث ,,,,,,
ليست هناك تعليقات:
إرسال تعليق