👈 طبعا كلنا فكرنا امتى نشتغل لحسابنا ونشيل شغل مقاولات ونكبر ودا طموح كل مهندس الا من ارتضي بمهنة الوظيفة اللى مش بتأكل عيش خصوصا اننا على كف عفريت ممكن نبقي برا وندور على شغل واحنا معانا خبرة فوق العشرين سنه فلازم نلحق نفسنا ويكون طموحنا مالوش نهاية علشان نوصل ولازم تفهم انك هتقابلك عقبات كتير لحد ماتتعلم اهم حاجة لا تيأس وعلشان ماطولش عليكم فى المقدمة يالا بينا نبدأ :
خلونى قبل مابدأ نقسم المقال لجزئين مهمين
الجزء الاول : لازم تسأل نفسك ايه المفروض انى محترف فيه ويميزنى علشان اشيل شغل لحسابي ؟؟؟
الجزء التانى : خود منى كبسولات نصايح قبل ماتشيل شغل لحسابك يا بطل
الجزء الاول
- علشان تجاوب على السؤال دا اقرأ النقط دى اللى المفروض تكون بتعرف تعملها ومنها تقيم نفسك وهي :
- ازاى تعمل معاينة للموقع او المبنى وانك بتعرف تنفذ البند دا كويس جداااا وتستلمه بنفسك
- ازاى ترفع مقاسات الفراغات وتعمل مخطط لنفسك
- ازاى طبعا تعمل حصر للكميات
- ازاى تعمل مقايسه ومنطوق البنود
- ازاى تسعر بنود المقايسه وتحللها بكل مصروفاتها
- انك تعرف اسعار خامات السوق وتتابع تتطورها
- ازاى تحط نسبه ربح امتى 15 % وامتى 25 % ودا بيتحدد طبقا لتحليلك للمصروفات
- ازاى تكتب عقد
- ازاى تعمل مستخلص
- ازاى تسوق شغل بعمل صفحات على التواصل الاجتماعى
- اهم حاجة محتوى الصفحة كله بيتكلم عن شغلك مش تافه ويفضل يكون صفحة خاصة بالشغل بعيد عن تيتا وجدو والكلابيظ الصغيرة
- متابعه جروبات خاصه بشغل مقاولات وتتفاعل معاها باكونت الشغل وتجاوب وتظهر انك فاهم شغلك
- صور شغلك وصدع الناس بحلاوته
- اطبع كروت شخصية بيك ببياناتك ومجالك
- اعمل دواليب صنايعيه وكل دولاب ليه البديل ليه تحسبا للمرقعه بتاعت الصنايعيه اللى كلنا عارفينها
- لازم تعرف معدلات استهلاك المون والخامات --- تابع مدونتى
- لازم تتابع وتعرف طبعا اسعار يوميات الصنايعيه والعمل باليوميه ولا بالانتاجيه ونصيحه منى خليهم بالانتاجيه
- لازم طبعا تعرف اسعار المقاول الباطن وايجار المعدات والنقل والتشوين وووو
- لازم تعرف حضرتك الفرق بين cost contract - price contract - cost plus ولو مش عارف ما تسألنيش عشان انا هسال انا كمان --- هههه لا طبعا لو مش عارف اكتبلى ف التعليق وانا ارد على اى سؤال
- لازم تعرف طبعا الفرق بين المقاولات والاستثمار العقاري واتحاد الملاك
- لازم تعرف تسعر وتحسب كميات تقريبيه لاى حاجة
- لازم تعرف تعمل برنامج زمنى
- لازم يكونلك علاقااااااااااااااااااااااااااااااااااات سواء مع الملاك او جهاز المدن علشان التراخيص وانك تاخد شغل
- حدد لنفسك هتشتغل ف ايه ؟ خرسانات ولا تشطيبات ولا متكامل ولا بند واحد ونصيحة ابدا ببند وواحدة واحدة لحد ماتاخد متكامل
- لو حتفتح مكتب لازم تحدد ايجار ولا تمليك و تكون عارف اجراءات البطاقة الضريبية والسجل التجاري بمعرفة محاسب قانوني ولو حتتعامل مع شركات لازم تعرف اجراءات التسجيل في اتحاد المقاولين وتحدد نوع المؤسسة وازاي تعمل سجل هندسي
- متابعة اي بوستات علي الفيس بوك او علي اليوتيوب بتتكلم علي شغل المقاولات وازاي تكسب منها وانصح بمتابعة المهندس Wael Abd Elmoneam ببوستات شغل المقاولات والمهندس Abdulrahman Al Sharnouby علي اليوتيوب في شغل المقاولات
- لازم يكون عندك مهارات Marketing و Sales مثل :
ازاي تعرف تتكلم مع العميل سواء مكالمة او مقابلة وتعرف ايه الي هو محتاجه وازاي تعرض نقاط قوتك وازاي يكون سعرك منافس للسوق
- لازم تلتزم بمواعيدك وتهتم بمظهرك ولبسك
الجزء التاني : نصايح في شغل المقاولات الخاص
- متتاخرش في اخذ الRisk عشان كل ما تتاخر كل الموضوع حيبقي اصعب ويفضل تبدأ فيه قبل الجواز
- منصحكش تفتح مكتب في الاول عشان تاخد الRisk واحدة واحدة
- لو اشتغلت في شركة صغيرة في الاول بتعمل فيها حجات كتير متزعلش لان ده حيديك خبرة كويسة تقدر تشتغل بعد كده لحسابك
- في الاول حتشتغل من العلاقات القريبة منك
- ممكن تستعين بمكاتب التسويق العقاري عشان يجبولك الشغل
- ممكن تستعين بحد خبرة يساعدك بس متطولش اوي في الشراكة عشان مفيش حد ثقة مية في المية
- لازم تهتم اوي باول شغلانة عشان دي الي حتعملك سمعة
- العميل دايما بيدور علي minimum cost ,time and maximum quality
- لو حتشتغل خرسانات بيكون من العلاقات اما لو حتشتغل تشطيبات بيكون online فلو حتعمل صفحة علي الفيس بوك تكون شغل تشطيبات
- فيه افكار للشغل زي ارضيات Hdf او شغل كرانيش فيوتك او جبسمبورد او ترميمات
- لازم تكون عارف انك عشان تسعر اي حاجة
- Direct cost + indirect cost + profit
- ومتنساش الضرايب ومتنساش معدل التضخم
- متدفعش من جيبك خالص المالك هو دايما الي يدفع
- لازم تربط دايما العمال بفلوس ومتديهمش اول باول
- لازم تسيء الظن دايما في العمال حتي يثبتو العكس
- لازم يكون الشغل دايما علي اتفاقيات مكتوبة مش بالبوق عشان تكون كل حاجة واضحة
- لازم يكون قلبك جامد وعندك صبر وعافيجي وممكن يجيلك اوقات تشتغل صبح وليل
- لو شكلك صغير وخايف العميل ميقتنعش بيك لازم تبقي عارف ان لبسك وطريقة كلامك واسلوبك وخبرتك هي الي حتفرق
- لو خايف انك معندكش سابقة اعمال زي ما قولتلك صور دايما شغلك واشتغل مع المعارف في الاول عشان محدش حيسال عليك
- لو معندكش مكتب ممكن تقابل العميل في Co working space وتجيب سكرتيرة في اليوم
- متطلبش من المالك فلوس كتيرة مرة
- اوعي تسيب الوظيفة وتشتغل خاص قبل ما تاسس نفسك كويس جدا
- ممكن تشيل شغل مقاولات وانت موظف علي فكرة
- سر نجاح اي حاجة الاستمرارية
- لازم تبقي عامل حسابك ان شغلك ممكن يتاثر بتقلبات السوق
- ممكن تعمل اعلانات ممولة
- متستخدمش طريقة ان لو حد طالب شغل تدخل بكومنت بلينك صفحتك العميل بيدور علي الناس الي بتشكر فيه مش الي بيشكر في نفسه
- ممكن تستخدم شوية افكار تسويقية زي :
- معاينة مجانية
- رفع مقاسات وحصر كميات وعمل مقايسة مسعرة مجانا
- عمل رسم 3d للشقة وساعتها لازم تتعلم تصميم معماري وبرنامج زي 3dmax عشان ساعات المالك بيطلب تصميم معماري او ممكن توفر السكة دي وتستعين بمعماري شاطر صاحبك
- ضمان لمدة سنة ضد عيوب التنفيذ
- شطب شقتك في شهر واحد
- شطب شقتك بارخص سعر للمتر
- شطب شقتك بالتقسيط
- اشراف هندسي ببلاش
- دعم فني مجانا
لاي استفسار سيب تعليقك وانا هعمل نفسي مش شايفه
اخوكم : وائل ابوزيد
الله ينور عليك ياهندسه .وجعله الله فى ميزان حسناتك .وياريت لو يوجد فديوهات لحضرتك
ردحذفهل ممكن يوجد مكتب لتعليم شغل المقاولات
ردحذف👌👌👌
ردحذفالله يباركلك يا هندسه
ردحذف