👈 كتير مننا مايعرفش حاجة عن عربيته غير انه يعرف يدور عربيته ويمسك الدريكسيون والفتيس ويقفل بابه ويسوق ويا سلام بقا لو عرف ازاى يفول ويقيس زيت ودا مايمنعش ان الغالبية العظمى عباقرة فى اعطال العربية فانا عملتلكوا المقالة دى علشان لو حصلك اى حاجة منها لا قدر الله وانت ماشى تبقي عارف اسبابها ايه بدل ما الباشا الصنايعى او الميكانيكى يضحك عليك ويدفعك دم قلبك يالا بينا :
- وانت ماشي كدة زى الباشا مابتفكرش المدام طابخالك ايه ومركز ف عربيتك لقيت فيه هزة ( لا مؤاخذة يعنى ) فى العربية عند سرعة اقل من 100 كم/س يبقي لازم سيادتك ترصص امامى ( مش ليك للعربية )
- طب لو انت ماشي نفس المشوار وسبحان الله لقيت نفسك بردو مابتفكرش ف الطبيخ ومركز بردو مع عربيتك ولقيت فيه نفس الهزة اللى فوق اللى تعباك دى ( تعبانا كلنا والله ) بعد سرعة 100 كم/س يبقي لازم سيادتك ترصص خلفي (عدم المؤاخذة )
- هكلم طبعا اخواتنا البنات فى النقطة دى بالذات لانهم بيعشقوا الفرامل المفاجأة فى اعياد الميلاد لو حضرتك وانتى ماشية ومارستى هوايتك ودوستى فرامل مرة واحدة وحسيتى بهزة فى العربية تبقي حاجة اسمها الطنابير ( احفظيها كدة زى الشخاليل كدة ) بس خلى بالك لو الهزه طلعت جامدة لدرجة ان نوزك خبطتت فى الدريكسيون يبقي حد خبط عربيتك من ورا وانزلي اجري --نصيحة والله
- فلاش باك لنفس الموقف بتاع حضرتك يا هانم اللى فوق بس المرة دى فى نفس المكان جيتى تدوسى الفرامل لقيتى الدواسة ناشفة كدة زى الحجر فيبقى حاجة ما اتنين يا اما سمانتك ضعيفه ولازم تاكلى سمان كتير يا اما الاكيد طبعا السيرفو لازم يتغير ( اه والله وماحدش يشتم على الافيه اللى فات دا
- نيجي بقا لصحابنا الرجالة لو سيادتك ماشى كدة ورايح مشوار منيل فيه ارض مكسرة ولقيت كرشك هيتخلع من مكانة من كتر الرج والتنطيط وحاسس ان فيه خناقة عندك فى العربية تخبيط وترزيع يبقي يا اما مراتك جنبك وبتناقشك فى حاجة يا اما الاكيد دى جلب مقصات او بيض يا معلم ( بيض اه )
- طب لو حضرتك لقيتك العربية تمام وجيت تطلع على الاسفلت بعد المعركة اللى فاتت دى ولقيت العربية بتعوم منك كدة وعامله نفسها مايصة كدة مش ماسكة نفسها تبقي جلب مقصات بردو او المساعدين عاوزين يتشدوا ( مساعدين العربية حضرتك )
- نرجع لست الهوانم : لو ركبتى العربية وانتى ف كامل وقارك واحترامك كدة ودورتى العربية وكله تمام وجيتى تطلعى لقيتى العربية بتقل منك قدام الناس وتهزك هزة من بتوع صافيناز ( الله يمسيها بالخير) وطبعا بعد ماتحسي بالاحراج يبقي العربية بتقولك انا اسطوانتى او دسكى لازم يتغير ( ديسك العربية مش ديسكى انا ) طبعا دا للعربيات المانيوال بس
- طب لو ماحصلش الكلام دا والعربية طلعت اصيلة وبنت ناس بس وانتى سايقة عربيتك الاوتوماتيك لقيتى في خبطة كدة وانتى بتدى الغيار ( غيار العربية مش البيبي ) او تزنيدة كدة تبقي قواعد المكنة ( سورى يعنى ) مش تمام وعاوزة تتغير
- ونسيت اقول لحضرتك صحيح وانتى بتظبطي الميكب وانتى ماشية زى ماكتير بيعمل حسيتى برعشه فى المراية فهيا كدة مش بتعاكسك دى بتقولك ان فيه مشكلة فى قواعد المكنة حضرتك ولازم تفحصيها ( مكنت العربية والله )
- طب نيجى بقا لو حضرتك ماشية في امان الله كدة وبتغنى انا مش هرجعلك تانى وانتى بتاخدى ملف لقيتى الطارة اتأثرت بالاغنية ومارجعتش تانى لوضعها الطبيعى تبقي يااما افتكرت موقف زعلها اوى يا اما الصليبة عاوز تتصلح او تتغير
- نيجى للبرنس بتاعنا خصوصا للى عنده كرش جميل كدة يصلح كمقعد جميل كدة للاطفال واثناء ما ابنك قاعد كدة عليه بيتنطط وماسك الطارة والعربية واقفه كدة وعصر الطارة على اقصى اليمين او الشمال لقيت فيه طرقعة جامدة تبقي اسكترا
- طب لو صلحت سيادتك المشكلة دى وماشي مبسوط بقا وعملت رجيم والكرش نزل بس لقيت فيه طرقعه بردك بس المرة دى والعربية ماشية فى الملفات تبقي كبالن ( بنت الكبالن دى مش هتسكت انا عارف )
- طب لو سيادتك بتاكل سندوتش الشاورما وانت ماشي كالعادة احتفالا بالقضاء على مشكلة طرقعه الملفات ولقيت طرقعه فى الغيارات ( مش غيارات الداخلية لا ) غيارات الفتيس تبقي الكبالن الداخلية يا معلم معلش سيب الشاورما وكمل بعد ماتصلحها
- طب بعد ماحضرتك عملت رجيم بقا وبقيت راجل فتنس كدة وزى الفل اكتشفت وانت بتلف الطارة انها تقيلة كدة وبتنزيق يبقي انت محتاج تاكل كوارع علشان شكلك هفتان لو لسه بردو يبقي البطاحات زعلانة وعاوزة تتغير
- زى ما امى كانت بتقولى دايما لما تلاقينى باكل كتير انى كرشى مخروم وانا مش واخد بالي نفس النظرية دى لو لقيت الطفاسة فى عربيتك وبتاكل بنزين كتير يبقي كرشها مخروم ( حساس شكمان - موبينه - سلوك بوجيهات - بوجيهات نفسها - رشاشات ) كل الحاجات دى بتبقي عاوزة تتظبط بدل ماتدفع دم قلبك
- لو ست الكل كدة بعد ماتوصل بالسلامة وهيا شايلة كيس البطاطس وحزمة الجرجير قلبها خطفها على الكاوتش ولقيته يا حبت عينى درجه حرارة عالية اوعى تديلها كمادات دى تبقي تيل الفرامل قافش لا مؤاخذة
- لو انت ماشي كدة ولقيت صوت عالى جاي من بطن العربية ماتقلقش دى مش مغص او العربية واكلة كرنب دا يبقي شكمان
- لو انتى ماشية بقا يا بطة ولقيتى صوت بيفكرك كدة ب سبوع مودى ابن طنط شوشو وحركات اسمع كلام ماما وطظ ف بابا والكلام دا كان زلطة ف علبه صاج كدة دا يبقي فحم فى علبه البيئة
كدة بقا اظن عرفنا مشاكل العربية ولو الميكانيكى قالك غير كدة حط بوذة فى شكمان العربية اهو يتاكد من العطل بنفسه
بالتوفيق
وائل ابوزيد
ليست هناك تعليقات:
إرسال تعليق